Rydym yn derbyn y datganiadau a wneir gan y Cenhedloedd Unedig ar Hawliau Dynol, Hawliau Pobl a Nam Meddyliol a Hawliau Plant. Rhaid i'r rhain fod yn sail i unrhyw arddeliad o hawliau gan bobl ag anabledd dysgu. Rydym hefyd yn cydnabod pwysigrwydd y tri prif egwyddor a nodir yn Strategaeth ar gyfer Pobl ag Anfantais Feddyliol Cymru Gyfan (Anabledd Dysgu). Yn ôl y rhain mae gan bobl ag anabledd dysgu:

• yr hawl i fyw bywyd cyffredin yn y gymuned
• yr hawl i gael eu trin fel unigolion
• yr hawl i gymorth a chefnogaeth ychwanegol i ddatblygu i'w llawn potensial

Gan adeiladu ar athroniaeth Strategaeth Cymru Gyfan, credwn fod gan bob unigolyn ag anabledd dysgu yr hawl i:

1. Datblygu eu gallu corfforol, cymdeithasol, emosiynol, ysbrydol a deallusol i'r eithaf posib.
2. Addysg, hyfforddiant a chefnogaeth unigol.
3. Awdurdod dros bob agwedd o'u bywyd.
4. Mwynhau agweddau yn eu bywyd bob dydd sydd yn cael eu gwerthfawrogi yn ddiwylliannol yn y gymuned lleol.
5. Gallu gwasanaethu'r gymuned.
6. Sicrwydd economaidd a safon byw digonol.
7. Patrwm bywyd annibynnol.
8. Lleisio barn yn bersonol neu drwy eiriolydd.
9. Cyfleon i ailasesu eu hanghenion a'u gofynion.
10. Chwarae rhan lawn a rôl barhaol wrth gynllunio'r gwasanaeth a dderbyniant.

Ble bo'n angenrheidiol cwtogi ar hawliau'r unigolyn, rhaid i'r dull y gwneir hynny fod y lleiaf rhwystredig o'r dewis ar gael.

Yr Unigolyn a Gwasanaethau

Credwn fod yn rhaid i gynllunio, rheolaeth, cyflwyno ac adolygiaeth y gwasanaeth gael ei nodweddu gan y canlynol:

1. Mae gan bobl ag anabledd dysgu yr hawl i fod yn bartneriaid llawn wrth gynllunio, rheoli, cyflwyno ac adolygu'r gwasanaeth.
2. Mae gan bobl ag anabledd dysgu yr un hawl ag aelodau eraill y gymuned i wasanaeth sy'n cefnogi safon bywyd rhesymol.
3. Dylai gwasanaethau hyrwyddo annibyniaeth a hybu unigolion i wneud cyfraniad teg i fywyd y gymuned. Dylid edrych ar ddewis a chymryd risgiau fel caffaeliad i dyfiant personol.
4. Dylai gwasanaethau hyrwyddo integreiddio corfforol a chymdeithasol i'r eithaf trwy annog cyfraniad i fywyd y gymuned gan bobl ag anabledd dysgu.
5. Dylai gwasanaethau sydd ar gael i bawb yn y gymuned yn gyffredinol gael eu haddasu i sicrhau mynediad gan bobl ag anabledd dysgu.
6. Dylid ond cynnig gwasanaethau atodol i gwrdd ag anghenion a dymuniadau unigol.
7. Dylid ceisio gwasanaethau ar gyfer yr unigolyn ar sail asesiad traws-ddisgyblaethol a thraws-asiantaethol o anghenion.
8. Dylid darparu gwasanaethau i bobl ag anabledd dysgu mewn modd sydd yn galluogi unigolion aros yn eu cymuned leol a pheidio gorfod teithio yn rhy bell i dderbyn y gwasanaethau.
9. Mae yn well i bobl ag anabledd dysgu a'u teuluoedd os nad yw darpariaeth gwasanaethau yn dod o un corff yn unig ac nad oes gan un corff reolaeth dros pob agwedd o'u bywydau.
10. Dylai pob gwasanaeth fod yn rhwym wrth arolygaeth fewnol systematig ac archwiliad allanol.